मनहरी गाउँपालिका–१ का वडा अध्यक्ष शिवप्रसाद खनाललाई कक्षा १२ को परीक्षा उत्तीर्ण गरेको अवसरमा गैरसरकारी संस्थाहरुले सम्मान प्रदान गरेका छन् । यसअघि आफ्नै गाउँपालिका कार्यालयबाट सम्मानित भएका खनाललाई शुक्रबार मनहरी गाउँपालिकामा कार्यक्षेत्र बनाएर सामाजिक क्षेत्रमा क्रियाशील गैरसरकारी संस्थाहरुले सम्मान गरेको हो ।

५२ वर्षको उमेरमा कक्षा १२ उत्तीर्ण भएका वडाध्यक्ष खनाललाई संयुक्तरुपमा सम्मान गरिएको हो । खनाल हालै प्रकाशित कक्षा १२ को नतिजामा २.४१ जीपीएसहित उत्तीर्ण भएका हुन् । कार्यक्रममा हिमराइट्स मकवानपुरकी कार्यक्रम संयोजक कुमारी वाइवाले पढाइलाई उमेरले नछेक्ने रहेछ भन्ने कुरा वडाध्यक्षज्यूले पुष्टि गरिदिनुभएको भन्दै नयाँ युवा पुस्तालाई पनि अध्ययनको महत्व बुझेर अध्ययनलाई निरन्तरता दिन सुझाव दिइन् ।

कार्यक्रममा हिमराइट्स, माइती नेपाल, मकवानपुर महिला समूह, एस्थर बेन्जामिन्स स्मृति संस्था, शान्ति फाउण्डेशन, वुमन एक्टलगायत संस्थाका संयोजक तथा प्रतिनिधिले संयुक्तरुपमा वडाध्यक्ष खनाललाई खादा, माला दोसल्ला र सम्मानपत्र सहित सम्मान गरेका हुन् ।

पालिका प्रेस
थप जानकारी