नेपाल सरकारका नवनियुक्त २८ शाखा अधिकृतहरु थाहानगर भ्रमणमा

नेपाल सरकारको नवनियुक्त राजपत्राङ्कित तृतीय श्रेणीका अधिकृतहरुले थाहानगरपालिका भ्रमण गरेका छन् । नेपाल प्रशासनिक प्रशिक्षण प्रतिष्ठानद्वारा आयोजित ३८औं आधारभूत प्रशासन प्रशिक्षणमा सहभागी २८ जना नवनियुक्त अधिकृतहरुले २० जेठमा थाहा नगरपालिका भ्रमण गरी यहाँको भौगोलिक, सामाजिक, साँस्कृतिक, आर्थिक तथा प्रशासनिक विषयको बारेमा जानकारी लिएका हुन् ।

सामान्य प्रशासन, राजश्व र लेखा समूहका नव नियुक्त अधिकृतहरुलाई नगरपालिकामा आयोजित एक कार्यक्रमका बीच थाहा नगरपालिकाका प्रमुख विष्णु विष्टले नगरको समग्र अवस्थाको बारेमा जानकारी गराएका थिए । त्यसैगरी प्रमुख प्रशासकीय अधिकृत कृष्ण गिरीले नगरपालिकाको सामाजिक, आर्थिक, भौगोलिक, पर्यटकीय, प्रशासन, सुशासन आदि क्षेत्रको वर्तमान अवस्थाको बारेमा चर्चा गरेका थिए भने रोजगार संयोजक कुमार नेगीले थाहाको नामाकरण, थाहा दर्शन र रुपचन्द्र विष्टको जीवनीबारे प्रस्तुतीकरण गरेका थिए ।

देशका विभिन्न भागहरूमा एक हप्ता लामो अन्तरक्रियात्मक भ्रमण ‘आफ्नो देश जान्नुहोस् (KYC)’ को क्रममा प्रशिक्षार्थी अधिकृतहरु थाहा आएका थिए । उनीहरुले नगर प्रमुख विष्टसमक्ष नगरको विविध पक्षमा जिज्ञाशासमेत राखेका थिए । उनीहरुको जिज्ञाशामा नगर प्रमुख विष्टले प्रष्ट पारेका थिए । सो क्रममा सहभागी अधिकृतहरुले थाहाको विकासलाई एक ‘मोडल’को लिनुपर्ने बताएका थिए ।

उक्त अन्तरक्रियात्मक कार्यक्रममा थाहा नगरपालिकाका प्रशासन महाशाखा प्रमुख नवीन खालिङ, आर्थिक प्रशासन शाखा प्रमुख अमर जिसी, प्रशासन शाखा प्रमुख उमेश श्रेष्ठ, सूचना प्रविधि शाखा प्रमुख भगिरथ कार्की, सूचना अधिकारी सुरजकुमार भुजेल, लेखापाल सन्देश घिमिरे लगायतको सहभागिता रहेको थियो ।

नेपाल सरकारको नव–नियुक्त राजपत्राङ्कित तृतीय श्रेणीका अधिकृतहरुलाई नेपाल प्रशासनिक प्रशिक्षण प्रतिष्ठानले ४ देखि ६ महिनाको आधारभूत प्रशासनिक प्रशिक्षण दिने गर्दछ । प्रशिक्षण अन्तर्गत् आफ्नो देश जान्नुहोस् खण्डमा उनीहरुले सरकारी कामकाजको नजिकबाट अवलोकन र जनतासँग अन्तरक्रिया गर्र्दछन् । यस क्रममा उनीहरुले भौगोलिक, सामाजिक–आर्थिक र सांस्कृतिक पक्षहरूका बारेमा जानकारी लिनुका साथ सेवा प्रवाहको अवस्था र जनताको दृष्टिकोणबाट सुधारको दायराबारे पनि जानकारी लिने गर्दछन् ।

नेतृत्व, सार्वजनिक संचार, अनुसन्धान, विश्लेषण, समानुभूति, नवीन सोच जस्ता सीपहरू विकासको लागि नव नियुक्त अधिकृतहरुलाई देश भ्रमणमा पठाउने गरिन्छ ।