थाहा नगरपालिकाले स्वीकृत दरबन्दी बमोजिम जनशक्ति व्यवस्थापन गरी सेवाप्रवाहलाई प्रभावकारी बनाउने बताउँदै जनगुनासो सुन्नका लागि व्यवस्थित संयन्त्र तयार गर्ने जनाएको छ । आगामि आर्थिक वर्षको नीति तथा कार्यक्रम सार्वजनिक गर्दै पालिकाले सेवालाई चुस्त, दुरुस्त र जनमुखी बनाउने उल्लेख गरेको छ ।

नगरपालिकाको संगठन संरचना र दरबन्दी पुनरावलोकन गर्ने, सबै वडा कार्यालयलाई सुविधा सम्पन्न गराइने, उत्कृष्ट कार्य गर्ने कर्मचारी र शाखालाई मापदण्ड बनाई पुरस्कृत गर्ने, कर्मचारीको वृत्ति विकास गर्ने, प्राविधिक सेवा केन्द्र स्थापना गरी संचालनमा ल्याउने समेतको नीति नगरपालिकाको रहेको छ ।

पालिकाको सुशासन र परदर्शितालाई उच्च प्राथमिकतामा राखी प्रत्येक त्रैमासिक खर्च र प्रगति विवरण वेवसाइट मार्फत् सार्वजनिक गरी पालिकाका प्रवक्ता मार्फत आमसञ्चारका माध्यमद्वारा मार्फत् सार्वजनिक गर्ने, सुशासन र पारदर्शिताका लागि रेडियो, पत्रिका र अनलाइन सञ्चार माध्यम मार्फत पाक्षिक रुपमा नगर गतिविधि सार्वजनिक गर्ने जनाएको छ ।

नगरपालिका कार्यालयको प्रशासनिक तथा अन्य गतिविधिलाई अनलाइन र सफ्टवेयरमा आधारित प्रणाली अपनाउने नगरपालिकाको नीति छ । डिजिटल नगर प्रोफाइल निर्माण गरिने, नगरपालिकाको एकीकृत मोबाइल एप निर्माण गरी सूचना प्रविधिको प्रयोगलाई बढवा दिने, नागरिकले तिर्नुपर्ने कर, राजश्व तथा महशुल अनलाइन माध्यमबाट घरमै बसेर तिर्न सकिने व्यवस्था गर्ने थाहा नगरपालिकाले नीति पारित गरेको छ ।

यो पनि पढ्नुहोस्

थाहानगरको नीति तथा कार्यक्रम पारित [पढ्नुहोस् पूर्णपाठ]

पालिका प्रेस
थप जानकारी