बागमती प्रदेशका मुख्यमन्त्री किरण थापा मगरले प्रदेश सरकारले व्यक्ति विशेषको पहुँच र आग्रहका आधारमा योजना समावेश नगर्ने स्पष्ट पारेका छन् । उनले स्थानीय तहबाट सिफारिस भई आएका योजनालाई मात्र प्राथमिकता दिएर कार्यान्वयन गर्ने नीति प्रदेश सरकारले लिएको सुनाए । जिल्ला समन्वय समिति मकवानपुरले १७ कार्तिकमा हेटौंडामा आयोजना गरेको वार्षिक समीक्षा कार्यक्रममा धारणा राख्दै मुख्यमन्त्री थापा मगरले व्यक्ति विशेषका योजनालाई प्राथमिकता दिँदा प्रदेशमा अत्यधिक टुक्रे योजनाको संख्या बढेको र त्यस्ता योजना सम्पन्न गर्नसमेत कठिनाइ भएको बताए ।
मुख्यमन्त्री थापाले भने, “अब प्रदेश सरकारले व्यक्ति विशेषका योजना समावेश गर्दैन। स्थानीय तहबाट आएका योजनामा मात्र काम गर्छ। व्यक्ति विशेषका योजना समावेश गर्दा धेरै टुक्रे योजना बने। ती योजना पूरा गर्नै नसकिने अवस्था देखियो। प्रदेश सरकारले लगानी गरेको पनि नदेखिने अवस्था सिर्जना भयो।” सडक पूर्वाधार निर्माणका विषयमा पनि प्रदेश सरकारले नयाँ मापदण्ड बनाउन लागेको उनले जानकारी दिए ।
अब ६ मिटरभन्दा कम चौडाइका सडकमा प्रदेश सरकारले बजेट विनियोजन नगर्ने र साना सडक निर्माणको जिम्मेवारी स्थानीय तहलाई नै दिने नीति अघि सारिएको उनको भनाइ थियो । “प्रदेश सरकारले अब कुनै पनि सडकको ट्रयाक खोल्ने काम गर्दैन। त्यो काम स्थानीय तहले नै गर्नुपर्छ । स्थानीय तहले मापदण्डअनुसार ट्रयाक खोलेका सडकको स्तरोन्नतिका लागि मात्र प्रदेश सरकारले काम गर्छ,” उनले स्पष्ट पारे । खानेपानीको क्षेत्रमा धेरै काम भएपनि व्यवस्थापनको कठिनाइका कारण योजनाहरु दीगो नभएको मुख्य मन्त्री थापाको भनाइ थियो । उनले भने, –‘अब स्थानीय तहमा दर्ता भएका समिति मार्फत मात्र योजना सञ्चालन हुनेछ, यसका लागि मन्त्रालयले मापदण्ड तयार गर्दैछ ।’ अबको विकासमा आधुनिकतासँगै दीगोपनामा पनि ध्यान दिइने उनको भनाइ थियो ।
मुख्यमन्त्री थापा मगरले प्रदेश सरकारको औचित्यमाथि प्रश्न उठाउँदै प्रदेशको काम छैन भन्ने भाष्य निर्माण भइरहेको भन्दै त्यसको जवाफ सरकारले कामबाटै दिनुपर्ने बताए । उनले प्रदेश काम छैन भन्ने जुन भाष्य निर्माण गरिएको छ, त्यसलाई कामले नै चिर्नुपर्ने बताए । प्रदेश काम छ कि छैन भन्ने कुरा नागरिकले हेरिरहेका बताउँदै थापाले बागमती प्रदेशका १३ वटै जिल्लामा धेरै काम भएका तर त्यसको प्रचार गर्न नसकिएको उल्लेख गरे ।
प्रदेश सरकारले स्वास्थ्य क्षेत्रमा उल्लेखनीय काम गरेको दाबी गर्दै उनले जिल्लामै विशेषज्ञ सेवासहितका अस्पताल निर्माण हुँदा नागरिकले उपचारका लागि अन्यत्र धाउनुपर्ने र समयमै उपचार नपाउँदा ज्यान गुमाउनुपर्ने अवस्थाबाट राहत पाएको बताए । त्यस्तै सडक, खानेपानी, अन्य पूर्वाधार तथा सामाजिक विकासको क्षेत्रका प्रदेश सरकारले उल्लेख्य काम गरेको उनको दाबी थियो ।
त्यसै गरी, संघीय तथा प्रदेश सरकारबाट स्थानीय तहमा पठाइएका योजना समयमै अनुगमन हुन सके कार्यान्वयनमा गुणस्तर कायम हुने उनको भनाइ छ । योजनाको प्रभावकारी अनुगमन गर्ने जिम्मेवारी जिल्ला समन्वय समितिले पनि निर्वाह गर्नुपर्नेमा उनले जोड दिए । बजेट कार्यान्वयनमा स्थानीय तहको भूमिका महत्त्वपूर्ण रहेको उल्लेख गर्दै मुख्यमन्त्री थापा मगरले स्थानीय तहमा पठाइएका बजेट तथा कार्यक्रम कार्यान्वयनमा हुने ढिलासुस्तीले समग्र प्रगति प्रभावित हुने बताए । उहाँले स्थानीय तहलाई प्राप्त बजेट र कार्यक्रम समयमै कार्यान्वयन गर्न आग्रह गर्दै विकास निर्माणका काममा समन्वय, अनुगमन र प्रभावकारी कार्यसम्पादन आवश्यक रहेको धारणा राखे ।
जिल्ला समन्वय समिति मकवानपुरका प्रमुख ललितबहादुर घलानको अध्यक्षतामा भएको कार्यक्रममा प्रतिनिधिसभा सदस्य प्रशान्त उप्रेती, प्रदेशसभा सदस्यहरू कुमारी मोक्तान, भारती पाठक र प्रेमबहादुर पुलामी, प्रमुख जिल्ला अधिकारी बसन्त अधिकारी, स्थानीय तहका प्रमुख, उपप्रमुख तथा प्रमुख प्रशासकीय अधिकृतहरूको उपस्थिति थियो। कार्यक्रममा मकवानपुरका स्थानीय तहहरुले आर्थिक वर्ष २०८२÷०८३ मा सञ्चालन गरेका कार्यक्रमहरुको उपलब्धी, समस्या, चुनौति र अपेक्षाहरु समेत प्रस्तुत गरेका थिए ।
पालिका प्रेस
थप जानकारी
प्रतिक्रिया दिनुहोस्