बागमती प्रदेशको मुख्यमन्त्री तथा मन्त्रिपरिषद्को कार्यालयले प्रदेशअन्तर्गतका मन्त्रालय, निर्देशनालय तथा विभिन्न कार्यालयमा कार्यरत प्रशासन सेवाका उपसचिव र वरिष्ठ उपसचिवहरूको सरुवा गरेको छ। सरुवासँगै प्रदेशका उपसचिवहरूमा मन्त्रालय तथा निर्देशनालयमा रहेर काम गर्नेभन्दा मातहतका कार्यालयको प्रमुख भएर जिम्मेवारी सम्हाल्ने रुचि बढी देखिएको छ।
मन्त्रालय तथा निर्देशनालयमा कार्यरत केही उपसचिवहरू कार्यालय प्रमुखको जिम्मेवारीमा जान इच्छुक देखिएका छन्। विशेषगरी यातायात व्यवस्था कार्यालयहरू उपसचिवहरूको रोजाइमा पर्ने गरेका छन्। कार्यालय प्रमुखका रूपमा काम गर्दा प्रशासनिक नेतृत्व गर्ने, निर्णय प्रक्रियामा प्रत्यक्ष संलग्न हुने र सेवा प्रवाहमा प्रभावकारी भूमिका निर्वाह गर्ने अवसर प्राप्त हुने भएकाले पनि मातहतका कार्यालयप्रति आकर्षण बढेको कर्मचारीहरूको बुझाइ छ।
मुख्यमन्त्री तथा मन्तिपरिषद्को कार्यालयमा सरुवाका लागि निवेदन आएकाहरु र दुइ वर्ष अवधि पुगेकाहरु प्रशासनका उपसचिवहरुको सरुवा गरिएको मुख्यमन्त्री किरण थापामगरले बताए ।
अहिले प्रशासनका उपसचिबहरुको सरुवा गरिएको र भौतिक पूर्वाधार विकास मन्त्रालय, कृषि, पशुपन्छी, वन तथा वातावरण मन्त्रालय, स्वास्थ्य तथा सामाजिक विकास मन्त्रालय, खानेपानी, उर्जा तथा सिँचाई मन्त्रालय र मातहतका कार्यालयका उपसचिव तहका कर्मचारीहरुको सरुवा गरिने मुख्यमन्त्री थापा मगरले बताए । सबैको सरुवा दशै विदा भन्दा अगाडीनै गरिसक्ने समेत उनले बताए ।
यद्यपि, मन्त्रालय र निर्देशनालयमा कार्यरत सबै उपसचिवहरू कार्यालय प्रमुखको जिम्मेवारीमा जान इच्छुक देखिँदैनन्। केही कर्मचारीहरू भने कार्यालय प्रमुख बन्ने अवसर खोज्नुभन्दा एक कार्यालयबाट अर्को कार्यालयमा सरुवा भएर काम गर्ने प्रवृत्तिमा देखिएका छन्। यसले कर्मचारीको रुचि, अनुभव र जिम्मेवारीप्रतिको अपेक्षाका आधारमा सरुवा व्यवस्थापन गर्नुपर्ने आवश्यकतालाई पनि उजागर गरेको छ।
यसैबीच, सरुवामा अवसरको समान वितरण हुन नसकेको भन्दै केही कर्मचारीहरूले असन्तुष्टि व्यक्त गरेका छन्। लामो समयदेखि जिम्मेवारी र अवसरको प्रतीक्षामा रहेका कर्मचारीहरूले आफूहरूले पालोअनुसार अवसर नपाएको गुनासो गरेका छन्। उनीहरूले सरुवा गर्दा कार्यअनुभव, कार्यसम्पादन, सेवाअवधि र अवसरको उपलब्धतालाई समेत ध्यान दिनुपर्ने धारणा राखेका छन्।
प्रदेशका मन्त्रालय, निर्देशनालय तथा मातहतका कार्यालयमा कर्मचारी व्यवस्थापन गर्दा संस्थागत आवश्यकता र कर्मचारीको कार्यक्षमताबीच सन्तुलन कायम गर्नु महत्त्वपूर्ण देखिन्छ। कार्यालय प्रमुखको जिम्मेवारीमा योग्य र इच्छुक कर्मचारीलाई अवसर दिनुका साथै मन्त्रालय तथा निर्देशनालयको कामलाई प्रभावकारी बनाउन आवश्यक जनशक्ति व्यवस्थापन गर्नुपर्ने चुनौती पनि प्रदेश सरकारसामु छ।
कर्मचारी सरुवालाई नियमित प्रशासनिक प्रक्रियाका रूपमा लिँदै अवसरको न्यायोचित वितरण, जिम्मेवारीको स्पष्टता र सेवा प्रवाहको प्रभावकारितालाई प्राथमिकता दिन सके प्रदेशको प्रशासनिक कार्यसम्पादन थप प्रभावकारी बन्न सक्ने देखिन्छ।
उपसचिबहरुको कसको कहाँ भयो सरुवा ?
पालिका प्रेस
थप जानकारी
